RANGGONG DAENG ROMO
(1915-1947)
Nilassukangi ri kampong Bone-bone, Desa Maradekaya, Kacamatang Polombangkeng Salatang, Kabupaten Takalarak taung 1915. Manggena nikana Mangulakbe Daeng Makkiok, gallarang Moncongkomba. Ammakna nikana Bate Daeng Jimo. Sarikbattanna iami antu Hj. Hadiyah Daeng Memang, Hj. Mutti Daeng Lebong, Hj. Fatimah Daeng Ngasi, H. Makkatang Daeng Sibali, siagang Mappajalling Daeng Kawang.
Sikola natammakia Ranggong Daeng Romo iamintu H.I.S taung 1929, siagang Taman Siswa taung 1932.
Naia akkale rungkana mo nipakbunting mi siagang Bunga Tubu Daeng Lino, anakna gallarang Bontokadatto. Apaji na niakmo anakna lima, aimi antu Rahmawati Daeng Nginga, Ir. Abd. Hafid Daeng Jarung, Saenab Daeng Sannging, St. Fatimah Daeng Ngintang, siagang Mappatoba Daeng Bantang.
Ri lekbakna nipappilakbangang kamaradekanga na napaenteng pakrappungang (Organisasi) niarenga Garakang Muda Bajeng (Gerakan Muda Bajeng). Ri bokoanna nipinrai seng arena Garakang Muda Bajeng anjari Laskar Pemberontak Lipang Bajeng.
Tanggalak 17-7-1946 ammentemmi sekre pakrappungang niareng Lapris (Laskar Pemberontak Indonesia Sulawesi) sangkamma gabungang pasukang niaka ri Sulawesi Salatang, na ia tommo anjari pimpinanna. Naia pasukang amminawanga irawanganna Lapris kammayami, Lipan Bajeng ri Takalarak, PPNI siagang KPS ri kota Mangkasarak, Kris Muda ri Mandarak, Pamuda Tanete, Amris ri Silayarak, PBAR ri Bulukumba, PPI ri Bantaeng, Buka ri Limbung, Laptur ri Turatea, KRAP, AAP siagang BPL ri Pallangga, Pamuda Marusuk, Pamuda Camba, Harimau Indonesia ri Pangkaje’ne ri Kepulauan, Gapris ri Soppeng, siagang BPRI ri Pare-pare.
Taung 1947 na niliungang benteng pattahanganna ri Sorodadu Balandaya (KNIL) tanisanna-sanna. Apaji na sibundukmo . Mingka I lalanna anne bunduka Ranggong Daeng Romo siagang siapa are pasukanna ammaliangi ri panngamaseanna Allah Taala.
Tanggalak 3 November 2001 na nipaknanungammo arenna anjari pahlawang nasionalak (Pahlawan Nasional) situruk surak katappukanna Parasideng RI (Presiden RI) no. 109/DK/THN dan No 01/XV/2001 tgl 3 November 2001.
